Шығыс Қазақстан облысындағы Құмбел шекара бөлімшесінде мерзімді әскери қызметін өтеп жүріп, өз-өзін атып өлтірген 18 жастағы Мұхамедияр Тастанның ісіне қатысты жаңа деректер белгілі болды, деп жазады Alash.kz.
Бұл іс бойынша бұған дейін кіші сержант сотталған болса, енді айыпталушылар қатарына бөлімше офицері де қосылды. Қорғаушы тараптың мәліметінше, марқұмның ата-анасы бұл қайғылы жағдайға бөлімше басшылығының да тікелей қатысы бар деп есептейді.
Бұған дейін, атап айтқанда 2025 жылдың шілде айында, аталған іс бойынша алғашқы үкім шыққан болатын. Сот кіші сержант Азамат Тақыбаевты қатардағы жауынгерге қысым көрсеткені үшін кінәлі деп танып, оны алты жылға бас бостандығынан айырды. Алайда марқұмның жақындары мұнымен келіспей, бөлімшедегі лауазымды тұлғалардың әрекетіне де құқықтық баға беруді талап еткен.
Ата-ананың арызынан кейін сот жеке қаулы қабылдап, бөлімше басшылығының іс-әрекетін қайта тексеруді жүктеді. Нәтижесінде Бас әскери прокуратура істі қарап, биылғы жылдың 6 наурызында офицер Елжас Тоқсанбайға қатысты айып тақты. Оған өз қызметтік міндеттеріне немқұрайлы қарады деген айып тағылып отыр.
Адвокат Батырбек Арынтаевтың хабарлауынша, офицерге қатысты сот процесі алдағы 22 сәуірге жоспарланған. Бұл отырыс әскери бөлімдегі тәртіп пен басшылық құрамның жауапкершілігіне қатысты көптеген сауалдарға нүкте қоюы тиіс. Қазіргі уақытта іс материалдары сотқа жолданып, тараптар алдағы талқылауға дайындалып жатыр.
