Бокстан Қазақстанның U-19 жастар құрамасы Венгрияның Эгер қаласында өтіп жатқан «Иштван Борнемисса мемориалы» халықаралық турнирінде сәтті өнер көрсетуде, деп хабарлайды Alash.kz.
Бас бапкер Бақыт Сәрсекбаевтың жетекшілігімен аталған жарысқа аттанған 18 отандық спортшының 12-сі қарсыластарын қапы қалдырып, финалдық кезеңге шықты. Бұдан бөлек, тағы 3 боксшымыз доданың қола жүлдесін қоржынға салды.
Жастардың жетістігі туралы журналист Аслан Қаженов былай деп жазды:
Венгрияда бокстан жасөспірімдер арасындағы халықаралық турнир өтіп жатыр. Оған 24 елдің өкілдері қатысуда. Оның ішінде Бақыт Сәрсекбаев баптайтын ұлттық құрама да бар. Жарысқа бас-аяғы 18 жігітті апарған. Оның 12-сі финалға шықты. Айта кету керек, басым бөлігі нокаутпен ұтып жатыр.
