Posted inЖаңалықтар

Бозымбаевтың бұрынғы көмекшісі ұсталды

Халықаралық жасыл технологиялар және инвестициялық жобалар орталығының басқарма басшысы Олжас Ағабековтың ұсталғаны жайлы алдымен ақпарат БАҚ-қа тараған.

Ол Дубайдағы халықаралық көрмеде қазақстандық павильонға бөлінген қаражатты жымқырды деген күдікке ілініп отыр. 270 миллион теңгелік сома іске негіз болған.

Олжас Ағабеков мансабын Қанат Бозымбаевтың көмекшісі болып бастаған. Президенттік кадр резервінің мүшесі. Ол жылдар бойы энергетика, содан кейін экология және табиғи ресурстар министрлігінде жұмыс істеді.

Сондай-ақ, «Алматы электр станциялары» АҚ, «KEGOC» АҚ, Жамбыл облысы әкімінің аппаратында, Жамбыл облысының кәсіпкерлік және индустриялық-инновациялық даму басқармасында жұмыс істеді.

2016 жылдан 2022 жылдың қыркүйегіне дейін – энергетика министрлігінің Климаттың өзгеруі жөніндегі департаменті директорының орынбасары, экология, геология және табиғи ресурстар министрлігінің климаттық саясат және жасыл технологиялар департаментінің директоры болды.

Orda.kz жазуынша, тергеу органдарының назарына вице-министр Мансұр Ошурбаев та ілінген.

2024 жылдың 5 ақпанында жедел-тергеу тобы көп ұзамай ұсталған Ошурбаевтың қызметтік үй-жайындағы құжаттар жинаған.