Референдум учаскесі мүшелерінің айтуынша, әже әркез жастарға үлгі болып, мемлекеттің іргесін нығайту бағытындағы өзгерістерден қалмай, өз үлесін қосып келеді
Алматы облысы Жаркент қаласының тұрғыны, 100 жастағы Зейнелхан Оспанова референдумда дауыс берді.
«Jetisu Media» өңірлік коммуникациялар орталығының мәліметінше, ғасыр жасаған кейуана барлық саяси науқандардан қалмай, белсенді түрде қатысып келеді. Ол соңғы 30 жылда болған сайлау мен референдум есінде қалғанын жеткізді.
«Ұрпақтарым аман болсын! Артымыздағы жастар аман болсын! Жаркентіміз көркейе берсін. Қазақстанымыздың жақсы бір азаматтары болып өссін! Жастарымыз аман болсын! Өсе берсін! Қазағымыздың санын көбейте берсін», – деген Зейнелхан Оспанова жастарға өз батасын берді.
Айта кетерлігі, Зейнелхан Оспанова – 12 құрсақ көтеріп, тәрбиелеп жеткізген «Алтын алқа» иегері.
Референдум учаскесі мүшелерінің айтуынша, әже әркез жастарға үлгі болып, мемлекеттің іргесін нығайту бағытындағы өзгерістерден қалмай, өз үлесін қосып келеді.
Одан бөлек кейуанаға алғашқы дауыс беруші ретінде естелік сыйлық табысталды.
Бүгін Алматы облысы бойынша 1053 референдум учаскесінде дауыс беру жүріп жатыр. Өңірде дауыс беру құқығына ие электорат саны 1 млн 200 мыңнан асады.