Ресей президенті Владимир Путин тату көршілерімен қарым-қатынасын дамытуға бел буып отырғанын Бішкекте өтіп жатқан Еуразиялық экономикалық форум барысында айтты.
Путин Еуразиялық экономикалық одақ құру туралы бастаманы Нұрсұлтан Назарбаев көтергенін еске алды.
Сонымен қатар, ол Еуразиялық экономикалық одақ құру кезінде Назарбаев Ресей алдына таңдау қойғанын айтты. Оның айтуынша, сол кезде Ресей алдында тікелей көршілерімен белсенді әрі терең ынтымақтастық орнату, не Дүниежүзілік сауда ұйымына кіру таңдауы тұрған.
«Біз ДСҰ кіруге деген ниетіміз бен батыстық әріптестермен қарым-қатынасты дамыту мүмкіндігі бола тұра басымдықты тікелей көршілеріміз және Кеңес одағында бірге болған елдермен ынтымақтастық орнатуға бердік» деді Ресей президенті.
Форум кезінде Владимир Путин Үлкен Еуразия стратегиялық жобасын құруға ұсыныс тастады.
Оның айтуынша, қазіргі халықаралық жағдайда дәстүрлі сауда-экономикалық, логистикалық байланыстар үзіліп жатқан тұста бұл жобаның маңызы зор.